مين ال قالك انه مات || رثاء السيد الوالد .

مين ال قالك انه مات 

مين ال قالك انه حبة ذكريات 

دا الحقيقة فى قلبى مليانه حكايات

عن ملامحه عن مواقفه وال فات 

مين ال قالك انه مات 

بصته ليا يوماتى نحتت اللون والصفات 

والكلام بالليل يعلم كل أنواع الحاجات 

مين ال قالك انه حبة ذكريات 

وقفته جانبى فى شدايدى خلته أفضل صديق 

مسكه الايد ال شدت عود طرى طول الطريق 

سندة الضهر ال قتلت كل شده وكل ضيق 

شيله الكتف ال علت للسماء و عملت بريق 

كل أفكاره فى خيالى ترسم الشده رفيق

مين ال قالك انه مات

مين ال قالك انه حبة ذكريات

كل لمسه حب عدت فوق كتافى علمت ،،، سابت اثر

كل كلمه نصح قالها طول حياته فهمت ،،، قوت نظر

و حكاياته و رواياته و الكلام جوا القصص له طعم تانى

حزه الحاجب و لمه طوق ايديه لما كان يغضب تادبنا فى ثوانى 

فى السند كان حاجه تانيه 

كان فى ضهرى لما كنت حيطه مايله

كان يعلمنى التفائل و المرؤه و الكرم

كان يعدى عشانى كل أودية الألم 

كان بمعنى الكلمة راجل

كل ألفاظ اللغه كات سيف فى ايده 

حتى اوديه البلاغة كانت وريده

مين ال قالك انه مات 

مين ال قالك انه حبة ذكريات 

اصلى كنت هناك بعزى يوم وفاته 

أصل دمعه حزن نزلت على الفراق 

اصلى كنت بنادى صاحبى بس برده الدفن فاته 

أصل فكره موته وقفت السباق

مين ال قالك انه مات 

مين ال قالك انه حبة ذكريات 

فى الأثر كانوا يقولوا ال خلف ،،، لسه عايش

لسه عايش جوا ابنه وال جاى من عياله ،،، لسه عايش

لسه عايش جوا طلابه فى مجاله ،،، لسه عايش

لسه عايش جوا كلمه كتبتهاله ،،، لسه عايش

لسه عايش فى وأحمد ،،، لسه عايش 

مين ال قالك انه مات 

مين ال قالك انه حبه ذكريات .